Kuwait Movie

شوفوه و قولولي شرايكم

http://www.youtube.com/watch?v=KGOI9zNaMJ8

لا يطوفكم

ليش جذي ؟؟

بسم الله الرحمن الرحيم

انا بصير مينونة من الاشكال اشوفها كل يوم, بالدوام و بالسوق و بالشارع و بالجمعية و كل مكان .. أبتدي من وين, شقول شخلــّي, لاعت جبدي...

نبتدي من البنات اللي مادري من وين طالعين, من الصبح مكياج و تسريحات و "بف" شكبره و لوعة جبد, طبعا غير النفس الخايسة و الاطباع اللي تلوع الجبد, لا سنع و لا اتيكيت و لا انوثة ولا براءة.. مثلا, أمس الصبح شفت وحدة "شامرة" بالسيارة الكشخة, و لبسها ماركات من فوق لي تحت, و حالتها حالة, و اغراءات, بس المشكلة الكبيرة , انها ماكو سنع, ليش ؟ لأنها تبرق من الترتر اللي لابسته مع العلم اني شفتها بالصبح, مكياجها مكياج سهرة, تسريحتها تسريحة عروس, تراجيها واصلين لي جتوفها, و لما ابتسمتلها عطتني نظرة خايسة و لفت ويهها, و أخيرا وليس آخرا, طالعة من البيت مو ماخذة شاور لأنه مبين ان يلدتها مقطنة و متسبحة بالكلونيا عشان ترقـــّع الوضع.. و بعد في بعض المتحجبات الله يهديهم, يلبسون لبس ما صار, لبس يفصل الجسم و مكياج يخرع و دنيا ! غير المشية "المصطنعة" و الدلع الماصخ و التمغط بالحجي, الله يهديهم و الحمدالله والشكر.. المهم, راح تسألوني شعليج منهم؟ شعلي؟ فشلة ! لما أحد أجنبي يشوف هالاشكال شيقول عن بنات الكويت, شي يحرّ القلب و يحز بالخاطر .. وين بنات أول اللي كلهم سنع و طيبة, قلوبهم بيضا, لا حش ولا حقد, الشعر تخليه طبيعي و اللبس مستر و راقي و كله انوثة, وين لسانهم اللي ينقط عسل , وحجيهم اللي يرد الروح, و النظافة و السنع, مو ألحين, البنات مخوخهم فاضية, ما يعرفون غير المكياج و اللبس و الحش, ماكو وحدة تقرا كتاب, و لا جريدة و لا مقالات ولا شي, كله هياته و طايرين بعمرهم .. استغفرالله.. ليش جذي ؟؟؟؟
انا أشك ان اللي يسوونه يا ياي من جهل او قل تربية, أو انهم يحسون بفراغ جنسي أو عاطفي, لأنه هالشي ما ايي من عدم, ايي من نقص يحسون فيه, و الرغبة بلفت الانتباه,بالكويت مشكلة جنسية كبير, الرجل ينظر للمرأة انها مصدر للمتعة أو وسيلة يشبع فيها رغباته, و الدليل ان معظم الشباب لما يشوفون البنت يجيكون على جسمها, و عقبها ينعجبون فيها, حتى لو ويهها ما ينشاف, المهم الجسم, و البنت نفس الشي تبي تلبس شي يطلع جسمها و مفاتنها و تسوي اغراءات حق الشباب عشان تحصل على الانتباه اللي يمكن مو محصلته بالبيت أو غيره.. وين أووول؟؟ قولوا الحمدالله و الشكر..لييييش جذيييي ؟ قولولي !!

عشـقي لـلـرقّـــــي

شنو أحلى من رقــّية بـــــاااااردة تسرسح عالجبد بهالحر و الرطوبة و القـتــّة..... من شهر 6 أو 7 و انا هابــّة بالرقــّي بشـكل مو طبيعي, كل شوي مطرشة الخـدّامة تييبلي رقــّي.. صار فيني ادمان رقــّي, كل شوي أشتهي رقــّية, و أحلى شــَي لمـّا

أشوف "مـارلين" امجبلة علــّي شايلة الصينية اللي فيها فلوح الرقــّي الحَمَرْ اللــّي يـلــِق من بعيد, آآآخ و أنطرها تروح عشــان أهجم و آكل على راحتي بشـِـفاحة...

آآآخ عالرقــّـــي..

و بمناسبة الرقــّي , ودّي أعطيكم فكرة سريعة عن فوائد الرقــّي

ينعش الجسم لأنه يتكون على تقريبا 90% من الماي-

يخفف ضغط الدم-
يحارب الامساك لأنه فيه وايد ألياف-

يساعد على ادرار البول "وانتو بكرامة"-

يفيد مرضى الروماتيزم "بعيد عنكم" لأنه فيه وايد بوتاسيوم و مغنيسيوم و معادن-

فيه هم وايد فيتامينات-

ينعش و يرطب البشرة و يسرسح عالجبد-

من طرائف جحا : حُكم على جحا بالإعدام، فقالوا له: ما هي رغبتك الأخيرة هل تشتهي
أن تأكل شيئا قبل أن تموت؟
قال: نعم، اشتهي البطيخ
فقالوا له: ولكن هذا ليس موسم البطيخ
فقال جحا: انتظر موسمه، فلست مستعجلاً

و سلامتكم

الكويت بعد العطلة ..

عطلة الصيف على وََشََك انها تخلص, قاعدة بالطيارة مشتطة لاني رادة الكويت لأني ولهت عليها وايد, و قبل لا نهبط قاعدة أوزع ابتسامات حق الأكو و الماكو و أقول حق روحي, يا فلانة "ما بقى شي و توصلين الكويت", و طبعا طلّعت الحمرة و الكلونيا و الكريم, كسائر البنات الكويتيات, و رديت أوّزع ابتسامات حق خلق الله..
المهم, وصلنا بالسلامة..عند باب البيت, طبعا أول شي أسّلم عالخدم و هم يطالعوني مشتطّين, جان أدش البيت و أشم ريحة البخور اللي ترد الروح ..
و أدش داري و أتسبح ذاك السِبوح العدِل بحمامي الحلو, جان أتعشى و انام..
أما بالنسبة حق ثاني و ثالث يوم, حاشتني الملاقة و ضيقة الخلق المو طبيعية .. ردينا حق الروتين المليق و ضيقة الخلق, و قعدة البيت اللي تييب القامت و الأكل ال "نون-ستوب" .. الجو استغفرالله ما يساعد ان نطلع نتمشى و لا يصير عندنا هواية مثلا, و لا بغينا نطلع, ماكو مكان يوّنس, حفظنا كل الاماكن, يا مارينا , يا سينما , يا عشا ولا غدا برّا, أو نشّري هدوم عشان نترس الكبت , أو نحش بالتليفون.. وااااي ملاقة استغفرالله